Nagsagawa ang Green Climate Fund (GCF) ng first supervision mission, na pinangunahan ng Food and Agriculture Organization of the United Nations (FAO), para sa proyektong “Adapting Philippine Agriculture to Climate Change (APA)” noong Pebrero 4, 2026 sa Barangay Sta. Victoria, Ilagan City, Isabela.

Bilang bahagi ng misyon, binisita ng opisyal ang AMIAhan Farmer Entrepreneur Agriculture Cooperative (AFEAC) sa Barangay Sta. Victoria upang obserbahan ang mga Climate-Resilient Agriculture (CRA) practices na nauna nang in-adopt ng mga lokal na magsasaka sa tulong ng Adaptation and Mitigation Initiative in Agriculture (AMIA) Program. Layunin ng pagbisita na suriin ang lugar kaugnay sa potensyal nitong maging model learning site para sa CRA component ng proyekto sa lugar, kasama ang iba pang AMIA villages sa rehiyon.

Pinangunahan ang misyon ng mga kinatawan mula sa GCF Mission Team, kabilang sina Mr. Frédéric Wiltmann, Sub-Regional Head-Southeast Asia, Department of the Asia and the Pacific Region , at Mr. Ivan Lawrence White, Portfolio Management Specialist Department of Asia and the Pacific Region Southeast Asia Subregion . Kasama rin ang mga opisyal ng FAO na sina Mr. Lionel Dabbadie, FAO Representative of the Philippines; Mr. Ryan Vita, National Assistance Coordinator; Dr. Jaime Montesur, National CRA Planning and Training Expert; at Mr. Tshencho Dorji, International Climate Information Services (CIS) Advisor, at mga kawani ng Department of Finance ng Pilipinas.

Dumalo rin sa aktibidad sina Ms. Jemflor Ann Santiago, National DA Project Coordinator ng APA, at Ms. Ana Liza Solis, Chief ng Climate Monitoring and Prediction Section ng DOST–PAGASA, gayundin ang mga kinatawan mula sa Department of Agriculture – Regional Field Office 02 (DA RFO2) sa pangunguna ni Ms. Kay Olivas, Regional Technical Director for Research and Regulations and GCF-APA Focal Person. Nakibahagi rin ang mga kawani ng Provincial Agriculturist’s Office, Philippine Information Agency (PIA), at iba pang eksperto sa Climate-Resilient Agriculture at Climate Information Services.

Sa pagtitipon, binigyang-diin ni Mr. Lionel Dabbadie, FAO Representative of the Philippines, ang pag-papalakas sa kakayahan ng sektor ng agrikultura. “I’m pretty sure that Philippine agriculture can strive despite the disasters…If we put this kind of project in place, we can definitely make agriculture great” ani Dabbadie.

Batay sa pangkalahatang layunin ng APA Project, inaasahang makikinabang ang 20 munisipalidad sa lalawigan ng Isabela mula sa mga interbensyon ng proyekto, partikular sa pagpapalakas ng institutional capacities para sa pagbuo at pagbibigay ng climate information at Climate-Resilient Agriculture services, gayundin ang pagpapalawak ng kaalaman at teknolohiyang makatutulong sa mas matatag at handang sektor ng agrikultura.

Istorya mula kay: AZA-ZEL T. ERRO